គណបក្សសង្គ្រោះជាតិកាលពីម្សិលមិញបានសម្រេចលើកបដាដែលមានរូបលោក កឹម សុខា និងពាក្យថា «ត្រូវដោះលែងលោកប្រធាន កឹម សុខា ជាបន្ទាន់ដោយគ្មានលក្ខខណ្ឌ» ដែលនឹងត្រូវដាក់នៅតាមស្នាក់ការគណបក្សទូទាំង ២៥ ខេត្ត រាជធានី។
លោក ប៉ុល ហំម អនុប្រធានគណបក្សសង្គ្រោះជាតិបានថ្លែងក្នុងសន្និសីទសារព័ត៌មាននៅស្នាក់ការកណ្តាលគណបក្សនៅចាក់អង្រែថា៖ «តាមការសម្រេចរបស់គណៈកម្មាធិការអចិន្រៃ្តយ៍គណបក្សសង្គ្រោះជាតិថ្ងៃនេះយើងសម្រេចលើកបដាមួយដើម្បីទាមទារទម្លាក់ចោលការចោទប្រកាន់ចំពោះឯកឧត្តម ប្រធាន កឹម សុខា។ សូមបញ្ជាក់ថា ឯកឧត្តម កឹម សុខា នៅតែជាប្រធានគណបក្សសង្គ្រោះជាតិនៅឡើយទេមកទល់ពេលនេះ»។
លោក ខៀវ សុភ័គ អ្នកនាំពាក្យក្រសួងមហាផ្ទៃថ្លែងថាការសម្រេចដាក់បដានេះគឺជារូបភាពបដិវត្តន៍ពណ៌ និងធ្វើតាមបញ្ជារបស់លោក កឹម សុខា ចេញពីពន្ធនាគារ។
លោក សុភ័គ បានថ្លែងថា៖ «នេះជារូបភាពមួយនៅក្នុងគម្រោងការរបស់គាត់ធ្វើបដិវត្តន៍ពណ៌។ គម្រោងការរបស់គាត់គឺទាំងអស់នេះ តាំងពីបដាតាំងពីអីកំប៉ិកកំប៉ុកគឺរូបភាពបដិវត្តន៍ពណ៌។ គោលការណ៍របស់គាត់មានតែទាំងអស់ហ្នឹង កឹម សុខា គាត់បានរៀបចំគោលការណ៍ក្នុងអ្វីដែល កឹម សុខា បានរៀនសូត្រមកពីអាមេរិក។ យើងគិតទុកមុនថាគេនឹងដើរផ្លូវណា។ យើងគិតមើលតាំងពីថ្ងៃ ៣ មកទើបតែចេញមកឥឡូវ កឹម សុខា ប្រាប់ពីក្នុងគុកមកហ្នឹង។ រឿងហ្នឹងរឿង សុខា ណែនាំពីក្នុងគុកមកទេ វាជាបដិវត្តន៍ពណ៌ទេ»។
ក៏ប៉ុន្តែលោកស្រី មូរ សុខហួរ អនុប្រធានម្នាក់ទៀតរបស់គណបក្សសង្គ្រោះជាតិបានថ្លែងថាសមាជិកសភារបស់គណបក្សសង្គ្រោះជាតិមិនដែលបានជួបលោក កឹម សុខា ទេ ចាប់តាំងពីមានការចាប់ខ្លួនគាត់មកហើយការសម្រេចលើកបដានេះគឺជាការសម្រេចរបស់គណកម្មាធិការអចិន្រៃ្តយ៍គណបក្ស។
ប្រធានគណៈកម្មាធិការប្រតិបត្តិគណបក្សសង្គ្រោះជាតិតាមខេត្តមួយចំនួនបានថ្លែងថាពួកគាត់បានលើកបដានោះរួចរាល់ហើយតាំងពីព្រឹកម្សិលមិញ។
នៅព្រឹកនេះដែរសាលាឧទ្ធរណ៍នឹងបើកសវនាការលើបណ្តឹងប្រឆាំងការចាប់ឃុំខ្លួនលោក កឹម សុខា ។ ប៉ុន្តែទាំងមន្ត្រីសាលាឧទ្ធរណ៍ និងអគ្គនាយកដ្ឋាន-ពន្ធនាគារ ថ្លែងថាពួកលោកមិនប្រាកដថាលោក កឹម សុខា នឹងមានវត្តមាន ឬយ៉ាងណាឡើយគិតត្រឹមល្ងាចម្សិលមិញ។
លោក ទូច ថារិទ្ធិ អ្នកនាំពាក្យសាលាឧទ្ធរណ៍បានថ្លែងថា៖ «សាលាឧទ្ធរណ៍ក៏ត្រូវរង់ចាំមើលក្រុមប្រឹក្សាជំនុំជម្រះនៃសភាស៊ើបសួរ គាត់ពិនិត្យទៅលើសំណុំរឿងនេះសិន។ សំណុំរឿងនេះសភាស៊ើបសួរត្រូវពិនិត្យលើលក្ខខណ្ឌនៃការស្នើសុំនៅក្រៅឃុំតែប៉ុណ្ណោះ។ នីតិវិធីរបស់តុលាការ បើសិនមិនមានវត្តមានរបស់ជនត្រូវចោទទេ ក្រុមមេធាវីតំណាងឲ្យជនត្រូវចោទគាត់អាចលើកបញ្ហាទាំងនេះមកឆ្លើយដោះសារនៅចំពោះមុខតុលាការបានដូចមិនមានអីប៉ះពាល់សិទ្ធិទេ»។
លោក ថារិទ្ធិ បន្តថា៖ «ខាងសាលាឧទ្ធរណ៍មិនអាចសម្រេចជួសមុខឲ្យអគ្គនាយកដ្ឋានពន្ធនាគារបានទេ ព្រោះអីភារកិច្ចការដឹកជញ្ជូនជនដែលត្រូវចោទជាសមត្ថកិច្ចរបស់អគ្គនាយកដ្ឋានពន្ធនាគារដូចចែងក្នុងច្បាប់ពន្ធនាគារ»។
ប៉ុន្តែលោក នុត សាវនា អ្នកនាំពាក្យអគ្គនាយកដ្ឋានពន្ធនាគារថ្លែងថាលោកកំពុងរង់ចាំការសម្រេចរបស់សាលាឧទ្ធរណ៍ទៅលើសំណើសុំពិចារណារឿងសន្តិសុខ និងសុវត្ថិភាពក្នុងពេលបញ្ជូនលោក សុខា មកចូលរួមសវនាការ។ «មកដល់ពេលនេះខាងខ្ញុំមិនបានទទួលការឆ្លើយតបទេ។ អាហ្នឹងដូចជាខាងអ្នកនាំពាក្យសាលាឧទ្ធរណ៍គេបកស្រាយហើយតើថាប្រហែលជាមិនអាចមានការអញ្ជើញគាត់ផ្ទាល់ទេប្រហែលជាអាចធ្វើតាមរូបភាពផ្សេងៗដូចជាតាមវីដេអូខនហ្វើរិនអានេះជាគំនិតខ្ញុំទេ»។
កាលពីម្សិលមិញសាលាឧទ្ធរណ៍បានទទួលលិខិតរបស់ក្រុមមេធាវីចំនួន ៨ រូបដែលការពារក្តីលោក កឹម សុខា ដែលបានស្នើសុំទៅសាលាឧទ្ធរណ៍ឲ្យមានវត្តមានលោក សុខា ដូចដែលចៅក្រមស៊ើបសួរនៃសាលាដំបូងរាជធានីភ្នំពេញបានសម្រេចឃុំខ្លួនលោក។
លិខិតចុះថ្ងៃទី ២២ កញ្ញា បានសំអាងលើហេតុផលរបស់ចៅក្រមស៊ើបសួរដែលបានសម្រេចឃុំខ្លួនលោក សុខា ក្រោមហេតុផលថាដើម្បីរក្សាជនត្រូវចោទទុកជូនតុលាការចាត់ការគ្រប់នីតិវិធី និងកុំឲ្យជនត្រូវចោទគេចវេះមិនចូលខ្លួនតាមការកោះហៅ។ ដោយសារហេតុផលនេះ ក្រុមមេធាវីថ្លែងថា៖ «ដូច្នេះគ្មានហេតុផលណាមួយត្រូវបានលើកក្នុងការរារាំងមិនអនុញ្ញាតឲ្យកូនក្តីយើងខ្ញុំចូលរួមក្នុងសវនាការឡើយ»។
លោក សំ សុគង់ មេធាវីម្នាក់ក្នុងចំណោម ៨ នាក់របស់លោក កឹម សុខា បានថ្លែងថាគិតត្រឹមរសៀលម្សិលមិញលោកមិនទាន់បានទទួលព័ត៌មានពីចៅក្រមនៅឡើយថាតើនឹងមានវត្តមានរបស់លោក សុខា ក្នុងសវនាការនៅព្រឹកនេះទេ? លោកថ្លែងថាក្នុងករណីដែលចៅក្រមសម្រេចបន្តនីតិវិធីដោយគ្មានវត្តមានលោក សុខា ក្រុមមេធាវីនឹងស្នើសុំពន្យារពេលសវនាការទៅថ្ងៃក្រោយ ដើម្បីទាមទារឲ្យមានវត្តមានលោក សុខា ។
ស្របពេលជាមួយគ្នានេះមានមន្ត្រីជាន់ខ្ពស់គណបក្សសង្គ្រោះជាតិមួយចំនួន កំពុងស្ថិតនៅក្រៅប្រទេស។
កាលពីពេលថ្មីៗនេះក្រុមទ្រទ្រង់គណបក្សសង្គ្រោះជាតិប្រចាំសហរដ្ឋអាមេរិកបានស្នើឲ្យសមាជិកសភា និងព្រឹទ្ធសភារបស់គណបក្សនេះវិលមកកម្ពុជាវិញ។ លោកនាយករដ្ឋមន្ត្រី ហ៊ុន សែន ក៏ធ្លាប់បានថ្លែងកាលពីពេលថ្មីៗនេះដែរថាមានសមាជិករបស់គណបក្សសង្គ្រោះជាតិខ្លះកំពុងរត់គេចខ្លួនទៅប្រទេសថៃ។
ប៉ុន្តែលោក សុន ឆ័យ ប្រធានក្រុមសមាជិកសភាបក្សសង្គ្រោះជាតិបានថ្លែងថា ការស្ថិតនៅក្រៅប្រទេសរបស់មន្ត្រីគណបក្សសង្គ្រោះជាតិមិនមែនដោយសារការភ័យខ្លាចទេ ប៉ុន្តែដោយសារការបំពេញភារកិច្ច។
«សូមបញ្ជាក់ដែរដូចជាមិនមានបញ្ហាភ័យខ្លាចទេយើងដឹងហើយមួយចំនួនមានបេសកកម្មទៅហើយការងារមួយចំនួនដែលគណបក្សត្រូវធ្វើការនៅខាងក្រៅដែលគណបក្សត្រូវឲ្យអ្នកទាំងនោះនៅបន្តការជួយពន្យល់ទៅសហគមន៍អន្តរជាតិអំពីស្ថានភាពនៅស្រុកយើង ប៉ុន្តែអស់លោកទាំងនោះនឹងត្រឡប់មកវិញនៅពេលឆាប់ៗ ដើម្បីបន្តការងាររបស់យើងទៅមុខទៀត»៕
ដោយ៖ The Cambodia Share | ចុច៖ Like ទំព័ររបស់ពួកយើងដើម្បីទទួលបាននូវអ្វីដែលថ្មីៗជាច្រើនទៀត
ប្រភព៖ postkhmer
Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.
0 comments:
Post a Comment